كلام ستات

«ناقوس خطر».. احذري 13 سلوكًا مع طفلك هيخلوه يعاملك وحش في المستقبل

السبت 04/سبتمبر/2021 - 10:54 م

عبدالله أبو الخير

أوصت الدكتورة سهام حسن؛ أخصائي تعديل سلوك الأطفال؛ بحسن التعامل مع الأطفال ومحذرة من 13 أمرا قد يتسببوا في سوء معاملة الأطفال والمراهقين لأهلهم، وذلك وفقا لما كتبته على حسابها الشخصي على فيسبوك.

حيث كتبت تحذر من الآتي:

1. لما ابنك يقفل على نفسه الأوضة بالساعات وميحبش القعدة معاك بسبب انتقادك ليه المستمر والكلام السم اللي بتقوله ليه.

2. لما ابنك يحب بطل ويتعلق بيه لأنه بطل خارق ويلاقي نفسه في حتة لعبة تقوله أنت بطل وكل كلامه عنه مش عن نفسه ومميزاته.

3. لما يكبر ويكره كلمة" ان شاء الله" لأن كل وعد بتوعده ليه تقول ان شاء الله وما يحصلش..

4. لما يكره الصلاة والمذاكرة لأن من أقل غلطة لازم تقوله صليت ايه انهارده؟ ذاكرت ولا لاء؟ كأن الصلاة والمذاكرة عقاب .

وتابعت سهام:

5. لما شخصيته تبقى ضعيفة ومعندهوش ثقة في نفسه لأنك طول الوقت مش بتديه فرصة يعبر عن نفسه وعن اللي جواه.

6. لما يكره الجواز والخلفه بسبب المشاكل اللي مش بتخلص وكل يوم يشوفها أدامه على أتفه الأسباب، و لما يكره النقاش معاك لأنك بتقلل منه رأيه في كل شيء.

7. لما كل يوم يعاتبك وهو في أوضته في سره وقد ايه في فجوة كبيرة بينكم ومفيش تفاهم ولا احتواء ليه.

8. لما يفشل في الكلية اللي من اختيارك بسبب تدخلك وفرض أحلامك عليه.

9. لما يكره السفر معاك في مصيف مثلاً لأنك بتتعصب عليه وممكن تتقلب الفسخة ولا الخروجة نكد وغم.

10. لما العيال تكره بعض لأنك بتفرق في المعاملة بينهم وتميز واحد ع التاني.

11. لما تلاقي ابنك كاتب على الفيس بوك كل ما احتاج حضن يحتويني لأنك مجربتش تحضنه حتى بكلمة حلوة.

12. لما يطلع معقد وحاسس بفشل بسبب كلمة "وانا قدك كنت بعمل وأسوي".

13. لما بنتك تبقى تعيسة في حياتها الزوجية بسبب عريس فرضته عليها .

وأنهت : "متزعلش بعد كدا أما تشتكي من معاملته ليك ومن المشاكل النفسية والسلوكية اللي بيعاني منها ابنك، بنتك وتلف بيه على دكاترة عشان تعرف السبب ايه؟؟، المثل بيقول: "يا كبار البيت اتوصوا بصغاره بكره صغاره يبقوا كباره".

اقرأ أيضًا..