طالبت الدكتورة سهام حسن؛ أخصائية نفسية وتعديل سلوك؛ من الآباء الهدوء والدعم للأبناء أيًّا كانت النتيجة، وألا يشعروهم بخيبة الأمل؛ لئلا تتكرر حالات الانتحار والاكتئاب، وذلك من خلال منشور رفعته على صفحتها الشخصية على الفيس بوك.

وكتبت سهام، أن ما حدث  ليس بأيدينا تغييره، ولا بد من التكيف مع الوضع ومحاولة وضح خطة بديلة.

بلاش لوم 

وأضافت:" بلاش لوم ونقد وجلد في العيال هرجع وأقول الثانوية العامة والتعليم الأكاديمي مش هو التقييم الوحيد للإنسان وعمرها ما كانت بالمجموع بكليات القمة والكلام اللي اتزرع في العقول وأفسدها".

هون على نفسك

ونصحت :" هون على نفسك وعلى ابنك أو بنتك وقولهم قدر الله وما شاء فعل احنا واثقين أنكم بذلتم ما في وسعكم وتعبتم يلا نفكر في اللي جاي ونحط سيناريو جديد تماماً وطظ في الحلم القديم مش آخر الدنيا ربنا كتبلك فرحة تانية في مكان تاني مش شرط كل اللي بنتمناه يكون خير لينا ربنا بيرزقك باللي انت محتاجه ويناسبك وتبدع فيه".

بلاش تشيلوا ذنبها للعيال 

وأردفت: "علاقتك بأولادك مش مبنية على توفير الفلوس عشان نحاسب العيال باللي اتصرف ومش المفروض إننا صرفنا ومنتظرين مقابل الصرف بمجموع محترم، اللي حضرتك صرفته كولي أمر هو المطلوب منك طالما تراضيت يكون عندك أولاد شايل مسئوليتهم فبصرف باعتدال عشان مضغطش نفسي وارجع ألومهم؛ لأن عملية التعليم نفسها مش عقول العيال هي المتحكم الوحيد فيها، في ظروف خارجية كتير اوي بلاش تشيلوا ذنبها للعيال وتعجز وتتقل خطواتهم الجاية".

وأنهت منشورها: "كلنا عندنا مشاهد وذكريات للثانوية العامة كرهتنا في التعليم وهزت ثقتنا في نفسنا بسبب الكلام وردود الأفعال في لحظة ظهور النتيجة، بالله عليكم بلاش تنقلوها لأولادكم، وباتمنى التوفيق للجميع وربنا يفرح قلوبكم بتحقيق أهدافهم في الحياة ويكونوا نفسهم وليسوا نماذج لآخرين، ويعيشوا في راحة بال وصحة نفسية".

اقرأ أيضًا||

رحلة انتحار طالبة عزبة النخل.. من "ادعولي أفرح أمي" لـ "اتقهرت من النتيجة"