كلام ستات

اسألي مجربة.. روشتة النساء للتعامل مع الرجل في سنة أولى زواج

الأربعاء 18/أغسطس/2021 - 10:40 ص

ادم صالح

يعد قرار الزواج من أهم القرارات التي يمكن أن تأخذها أي فتاة في حياتها؛ حيث يترتب عليه الكثير من التغيرات، خاصة وأن الزواج ليس أمرًا سهلًا، فهو يحتاج إلى تفاهم وقدرة على تحمل المسئولية ضمانًا لنجاحه.

من أهم السنوات

وتعد سنة أولى زواج هي أهم السنوات التي تمر على أي زوجين؛ حيث يتعلم الزوجان خلالها كيفية العيش معًا، ويبدأ كل طرف في التعرف على الصفات الشخصية عن قرب، وعن سؤال للمتزوجات حديثًا عن كيفية التعامل مع الرجل بعد الزواج، جاءت الردود كالتالي:

لو عاوزة حاجة اطلبيها

قالت سارة: "لو عاوزة حاجة اطلبيها دايركت هما مش بيفهموا التلميحات، وبلاش أي حاجة بينكم أو أي مشكله تخرج بره البيت أو توصل للأهل، وحاولي تحافظي على وقت مخصص ليكي في اليوم تعملي فيه أي حاجة بتحبيها، واديله مساحته هو كمان يبقى له وقت لوحده".

متناموش متخانقين

وأضافت ميرنا قائلة: "متناموش متخانقين، وماتستنيش ييجي يصالحك حتى لو هو غلطان، خدي المبادرة عشان مجرد ما حد بيبادر الموضوع بيخلص، وما ترموش على بعض المسئوليات، اللي يقدر يعمل حاجة يعملها وما يستناش التاني يعملها، ما تتناقشوش في حاجة وانتوا متعصبين أو لو لقيتوا صوتكوا ابتدا يعلى، تعالوا على نفسكوا واصبروا كام ساعة واهدوا وبعدين اتناقشوا براحة".

مشاكلكم ما بينكم

ونصحت نورهان: "مشاكلكم ما بينكم ما تطلعش برة خالص وتتحل في نفس اليوم، ما تناموش وانتوا زعلانين من بعض ومتدخلوش حد بينكم أبدًا، والصراحة مهمة، أي حاجة بتزعلك أو رفضاها اتكلمي علشان لو سكتي مرة واتنين هيبقى خلاص ده العادي، وهيقولك ما اتكلمتيش ليه من الأول".

نجاح الزواج

ولضمان علاقة سوية، قالت رنا: "كل حاجة ممكن تتحل بالتفاهم، الزعيق والعصبية والخناق مبيوصلوش لحاجة، لكن التفاهم بيبقى عامل زي نقطة كدا بنتلاقى فيها وبنلاقي مليون حل، ودايمًا شجعيه وزوّدي طموحه واديله مكانته ومتقلليش منه قدام حد، حسسيه إنك على طول فخورة بيه وواثقة إنه هيبقى أحسن واحد، في المقابل هيقدرك ويشيلك على راسه ويديكي وضعك".