رياضة

مأجلة جوازي.. جيانا فاروق: ضحيت من أجل أولمبياد طوكيو.. ومُدربي أبويا التاني وأخويا وصاحبي

الجمعة 13/أغسطس/2021 - 01:58 م

في أول ظهور لها عقب عودتها من طوكيو، حلت اللاعبة جيانا فاروق، الحاصلة على برونزية الكاراتيه في دورة الألعاب الأولمبية طوكيو 2020، ضيفة على برنامج "معكم"، الذي تقدمه الإعلامية منى الشاذلي على قناة cbc، مساء اليوم، الخميس.

أوضحت "جيانا" خلال اللقاء أنها لم تتوقع أي ميداليات في الأولمبياد، بل اكتفت فقط ببذل أقصى جهدها ولم تفكر في النتيجة، قائلة: "أنا كان عندي يقين إني عملت كل اللي عليا، اتمرنت كويس جدا ودوست على نفسي في التمرين رغم إصاباتي، ومدربيني تعبوا معايا وأهلي تعبوا معايا، فقولت يارب أنا عملت اللي عليّ لكن التوفيق من عندك، رجعني مجبورة الخاطر.. وقد كان".

أضافت أن كثير من المقربين نصحوها منذ سنوات طويلة بأن تعتزل، وتكتفي بما حققته من بطولات حتى الآن، قائلة: "قالوا لي كفاية كاراتيه ملوش مستقبل وأنتي أخدتي ألقاب دولية فكفاية بقى، وفعلا كنت ناوية اعتزل بعد بطولة العالم 2018، لحد ما طلع القرار في 2016 بعد أولمبياد ريو دي جانيرو إن الكاراتيه هيبقى في أولمبياد 2020 فقولت لا نكمل بقى لحد الأولمبياد".

تابعت: "أنا تقريبا مفيش بطولة في الكاراتية ملعبتهاش وكلهم أخدت فيهم ألقاب.. لكن تظل الأولمبياد الحلم الأكبر والأعظم لأي رياضي في العالم، والفوز فيها له طعم مختلف".

أوضحت "جيانا" أنها لو لم تحصل على ميدالية في أولمبياد طوكيو، فبالتأكيد كانت ستتعرض لأمور سيئة للغاية، قائلة: "كان ممكن مستحملهاش، هو في الأول وفي الآخر نصيب ربنا طبعا، لكن أنا في حاجات كتير أوي في حياتي ضحيت بيها عشان خاطر الأولمبياد دي، أنا مأجلة جوازي، وضحيت بوقتي مع أهلي، أختي راجعة من السفر بقالها شهر، أنا شوفتها في الشهر ده تقريبا 4 مرات بس، طبعا دا غير إن مفيش سفر ولا مصيف ولا حاجة بشاركهم فيها".

ووجهت جيانا الشكر للمعد النفسي الذي ساعدها كثيرا في هذه البطولة، لا سيما ليلة المباراة النهائية، حيث كانت تبكي كثيرا من كثرة تخوفها بأن تخسر المباريات، مضيفة: "أصل الأولمبياد مش مجرد بطولة، ما أنا لعبت بطولات كتير قبل كده، بقالي 20 سنة بلعب، معايا 11 بطولة عالم دا غير إفريقيا وعرب وبحر متوسط، بس البطولة دي مختلفة، وفعلا ناس كتير تعبوا معايا والنجاح ينسب ليهم كمان".

اقرأ أيضًا..

موكب البطلة جيانا فاروق يتوجه إلى المركز الأولمبي بعد وصولها القاهرة

أكدت جيانا أنها تدين بالفضل في كل شيء وصلت له في هذه اللعبة، لمدربها الكابتن محمد عبد الرجال، قائلة: "بالنسبة لي مش مجرد مدرب، ده أبويا اللي مربيني، أنا معاه بقالي أكتر من 13 سنة.. أدين له بكل الفضل في كل ميدالية أنا جبتها في حياتي، أنا لو كنت طلعت بحاجة من الكاراتيه فأنا طلعت بيه، لأنه بالنسبة لي مش بس مدربي، ناس كتير مبتبقاش مستوعبة حجم العلاقة اللي بيني وبينه، هو أبويا التاني وأخويا وصاحبي، لو عندي مشاكل شخصية بجري عليه، لو في أي حاجة في حياتي أنا بجري عليه".