بشكل نهائي.. توقف واتساب عن العمل على تلك الهواتف
إزاي تكسب قلب مراتك.. أستاذ علم نفس يوجه نصائح للأزواج بطريقة ساخرة
الجمعة 25/يونيو/2021 - 12:06 م
إزاي تكسب قلب مراتك
مريم أحمد
كشف الدكتور فتحي الشرقاوي أستاذ علم النفس بكلية الآداب جامعة عين شمس للأزواج عن الطريقة المثلى لكسب قلب الزوجة على الطريقة المصرية بطريقة ساخرة.
إزاي تكسب قلب مراتك
وكتب عبر صفحته الرسمية على موقع التواصل الاجتماعي فيسبوك قائلًا: إزاي تكسب قلب مراتك..على الطريقة المصرية، مش هقولك ادخل ومعاك بوكيه ورد، ولا هقولك سمعها وانت بتتعشا معاها.. مونا مور، ولا إنك تعزمها على شو بحيرة البجعة في الأوبرا، ولا إنك تعزمها على رحلة بحرية تطوفوا فيها شواطئ دول البحر المتوسط. من غير ما تنزلوا من السفينه لمدة أسبوعين.
ولا إنك تعزمها على رقصه سلو أو حتى فاست في سهرة ليليه في أحد الملاهي البريئة.
وكشف عن سر المعاملة: "لما تدخل عليها البيت تبقى شايل خضار ولحمه وفاكهة، ولما تقعد في البيت يبقى تشيل الواد والبنت، وتغيرلهم البامبرز وتسكتهم من الزن.. ويا سلام وانت بتغيرلهم البامبرز يبقى معاك مناديل مبللة لزوم تنشيفهم تاخد العيال وتتكشح لمده ساعتين كده بره البيت لما تلاقيها في المطبخ تقوم من سكات ودون زن منها.. لابس المريلة وواخد كل المواعين وتغسلها.
بس تغسل بأمانه وتحط الفيري صح وتنشف صح وترصص صح.
يضيف: يا سلام لو سحبت المكنسة وأخدت الشقه كلها وش ترويق، وبعدها ترتيب وبعدين تلميع. كل ما تحس إن مصاريف الشهر معاها خستعت.. تقوم تجري تحط في إيديها جزء من الاحتياطي النقدي.. لما تروح السوبر ماركت تشتري حاجات البيت تروح معاها تشيل العيال وتشيل الأكياس.. تحاسب الكاشير وتطلع معاها الحاجة لحد الشقة.. لما توصلوا بيتكم ترتب معاها كمان الحاجات إاللي جبتوها وتخزنها في أماكنها.
ويستطرد: "كل ما تلاقي باب شقتك خبط وبصيت في العين السريه. وشوفت اللي يضرب على عينه بتاع الغاز أو الكهربا أو البواب أو بتاع الزبالة.. تقوم من سكات وبجنتله دافع وكاعع من غير ما تقولها دفعت كام أو تطلب منها فلوس.. كل ما تروحوا أي زيارة في أي حته تقوم لامم الولاد حواليك ومسيطر عليهم وبنظرة منك مايتحركوش ويبقوا قاعدين زي الألف..
ويكمل: "لما تكون قاعد يوم اجازتك في البيت ترتب الأوضة وتلبس في رجلك شبشب.. ولما تاكل ماتوقعش أي حاجة على الأرض... وبالليل قبل ما تتخمد تطلع الزبالة بره وتطفي نور السلم.. وربنا يقدرنا على فعل الخير".
اقرأ أيضًا:
ويختم قائلًا: "لو عملت الحاجات دي..هتكون فارس فارس أحلام الست بتاعتك.ومش بعيد الست مراتك تعزفلك على الربابه والكمانجه قدام صاحباتها المقاطيع أحلى وأجمل موسيقي تصويرية لحضرتك..كحبيب وفارس احلامها اقصد تيتانك للرائعة سلين ديون... ".
