شراكة بين صندوق التنمية الحضرية و«بنك نكست» لتوفير سكن كريم للمصريين
أسما شريف منير تكشف حقيقة رجوعها لزوجها الأول: «كتير اتقال لي متتكلميش»
الأحد 30/مايو/2021 - 09:43 ص
أسما شريف منير تكشف حقيقة رجوعها لزوجها الأول: "كتير اتقال ل
محمود سلطان
كشفت البلوجر أسما شريف منير، عن كواليس طلاقها من محمد السكري، زوجها الأول، مؤكدة أنها لن تعود له مرة أخرى، موضحة أنها في وضع أفضل حاليا، وأنهما قررا أن يجتمعا لإسعاد ابنتيهما.
وشاركت ابنة الفنان شريف منير، جمهورها ومتابعيها عدة صور مع ابنتها، عبر حسابها الشخصي على موقع تبادل الصور والفيديوهات الشهير "إنستجرام"، وعلقت قائلة: "كتير اتقال لي متتكلميش، دي حياتك الشخصية، أنتِ بتتاجري بحياتك الشخصية ليه؟، خليكي في الميك أپ وحاجات البنات، امسحي الپوست ده، بلاش ملوش لزمة الكلام في الموضوع ده.. وعشان كل ده ضد اعتقاداتي واللي أنا مؤمنة بيه كنت بحس إني محبوسة في قالب مش بتاعي".
وأضافت: "أنا بحب أقول اللي حاسه بيه وأعبر عن نفسي وأساعد غيري من خلال تجارب حياتي، أنا المتابعين ليا النسبة الأكبر ستات ودي في حد ذاتها معادلة صعبة عشان ست زيك تثق فيكي، وفي آرائك، ومتغيرش منك مش بتحصل كتير، وعشان أنا أول ما اتعرفت كان من خلال تجربة طلاقي الأولى، وصلت لقلوب ستات كتير وكسبت ثقتهم وده كان الدافع الأساسي إني أقدم محتوى يفيدهم، كلمة مؤثر مش كلمة سهلة ولازم تبقي على أساس وابقي قد إني أبقى شخصية عامة وافيد غيري".
وتابعت أسما شريف منير حديثها عن حقيقي رجوعها لطلقها الأول محمد السكري: "مش كل الناس قد أنها تبقي جريئة وليها صوت، في ناس بتختار تصدر حاجات ممكن تبقي مش حقيقة بس عشان تتحب وتبان أنها شخصية متحققه وسعيدة ومسيطرة، وتخاف تقول ارئها لحسن تخسر، أنا بقي مش كده، أنا عرفت إني ليا تأثير إيجابي علي ناس كتير، أنا ليا اثر ورأي وبيتابعني 2 مليون شخص، ده رقم لو شفتوا علي الحقيقة ممكن يغمي عليا، لما اتكلم عن تجربة في حياتي وتساعد ناس تتقدم أو تتخطي موقف صعب أو تغير تفكيرها بيحسسني بسعادة ونجاح ميتوصفش، فا أنا مش هبطل أتكلم واقول كل اللي جوايا رغم أن في ناس هتفضل فهماني غلط، بس اللي بيفهمني صح هما اللي هفضل اتكلم عشانهم واساعدهم واطور من نفسي عشان افيدهم، عفويتي هي سر نجاحي".
وعن كواليس خروجها مع طليقها محمد السكري، قالت أسما: "أنا وأبو بنتي قررنا ننزل نخرج عشان لارا كان بقالها كتير مشافتناش في مكان واحد مع بعض، مشافتناش في كدر واحد مع بعض، ولأ إحنا مش هنرجع لبعض ولا مش بنفكر خالص في كده، لأن إحنا دلوقتي في وضع أحسن بكتير، يعني لما كنا مع بعض قررنا إننا منكملش لكن دلوقتي هنفضل في حياة بعض لآخر يوم في عمرنا عشان لارا هتفضل ربطتنا لآخر العمر، بنحترم بعض وعملنا معادلة من أصعب المعادلات في الدنيا وأنا فخورة بينا جدا".
وأردفت: "بلاش محاكم، بلاش نقول كلام وحش لأولادنا عن بعض من كتر الغيظ، بلاش أب يقابل بنته في نادي بوقت، والله العظيم كله بيخسر وأولهم ولادنا اللي ملهمش ذنب في اختلافنا.. التحضر في الموقف ده بيحافظ علي نفسية طفل يا يطلع سوي يا يطلع معقد، زي ما الأم بتخاف علي أكل وشرب ونوم وصحة ولادها والله نفسيتهم أهم من أكلهم وصارفهم، حتي لو في بينكم بلاوي، بدل ما تحاربوا بعض، اختاروا السلام وخلوا كتفكم في كتف بعض عشان الغلابة اللي ملهمش ذنب دول.. خدوا خطوة النهاردة عشان قسمًا بالله هترتاحوا بقية العمر. شكرا أبو لارا".
