عمر مرموش يتصدر قائمة الأكثر تأثيرًا في الشرق الأوسط
رسالة نهاد أبو القمصان للبنات ردًا على دعوة «اتجوزي اللي يقف في جنازة أبوكِ»
الأحد 23/مايو/2021 - 11:36 ص
رسالة نهاد أبو القمصان للبنات رداً علي دعوة اتجوزي اللي يقف
وجهت نهاد أبو القمصان المحامية بالنقض ورئيس المركز المصري لحقوق المرأة، رسالة للبنات رداً علي الدعاوى التي انتشرت على «فيسبوك» وبخاصة مبادرة «اتجوزي اللي يقف في جنازة أبوكِ».
واستنكرت أبو القمصان مثل هذه الدعوات مطالبة البنات بالوقوف في عزاء أبيها؛ لأنها ببساطة "بنت ابوها"، موضحة أن اختيار الزوج المناسب يكون لمن يحترم البنت ويحبها ويكملها ويعتبرك شريكة ويدعم نجاحها.
وعلّقت ابو القمصان علي الجدل الذي أثير حول وقوف كل من الإعلامي رامي رضوان والفنان حسن الرداد لتلقي العزاء في الفنان الكبير سمير غانم قائلة :"وقوف الزوج فى جنازة حماه دا العادى عند ولاد الناس المتربيين حتى لو اطلقوا وحصل ظرف زى دا عند طليقته بيروح يقف معاها بردو ويقف فى الجنازة لانه دخل البيت دا وكل فيه عيش وملح ".
«هير نيوز» تنشر نص البوست الذي نشرته نهاد أبو القمصان المحامية بالنقض ورئيس المركز المصري لحقوق المرأة، على صفحتها .
«فى عزاء الحبايب البنات كمان ظهر وسند 🌷
جنازة سمير غانم قلبت المواجع على كل المصريين فى عام أقل ما يقال عليه عام الحزن
كل بيت تقريبا فقد عزيز ، عملنا كلنا إسقاط لحالتنا على صور دنيا وإيمى شفنا فيهم نفسنا وبناتنا،
أنا شفت فيهم بناتى سهيلة وجميلة
وصور رامى رضوان وحسن الرداد ازواج البنات شفنا فيها ولادنا وأزواج بناتنا زى ما شفت فيهم اياد ابنى
لكن بعض البنات والستات وهما بيعملوا إسقاط للصور على حياتهم عكسوا تجارب مؤلمة جدا عن مخلوقات مؤذية عدت فى حياتهم اعتقدوا أنهم رجال
الستات دى تجاربهم المأساوية خلتهم شافو وقوف رامى رضوان وحسن الرداد فى عزاء حماهم فضل وعمل بطولى
ودعوات عجيبة بقصة اتجوزى اللى يقف فى جنازة أبوكِ
والحق انا شعرت بالإشفاق الشديد على البنات والسيدات اصحاب التعليقات دى
وجود شخصيات سيئة فى حياتهم خلاهم يشوفو العادى عمل بطولى ويتحسروا على نفسهم
حبيباتى ؛
وقوف الزوج فى جنازة حماه دا العادى والعادى جدا عند ولاد الناس اللى اهلهم ربوهم
لا والمفاجأة الكبرى
ان ولاد الناس المتربيين حتى لو اطلقوا وحصل ظرف زى دا عند طليقته بيروح يقف معاها بردو ويقف فى الجنازة لانه دخل البيت دا وكل فيه عيش وملح
مش معنى ان دخل بيت اى واحدة حد لا اتربى ولا يعرف الاصول ان دا العادى دا الاستثناء الشاذ
بس للاسف السوشيال ميديا زى البحر بترمى على الشط بعض المخلفات فتبدوا كانها العادى
الغالب فى الرجال الاصل والتربية وانهم ولاد الناس زى رامى وحسن
انتى لو عدى عليكى غير كدا يبقى غلطة اختيار مش طبيعة الحال
الحاجة الثانية ايه حكاية اتجوزى اللى يقف فى جنازة أبوكِ ؟
هو حضرتك ليه عايزة توصلى لدراعك دراع
لما ابوكى يتكل اقفى خدى عزاه علشان انتى جدعه بنت أبوكِ
خلى الجواز لاسباب تانية غير العزاء
اتحوزى اللى يحترمك ويحبك ويكملك ويعتبرك شريكه ويدعم نجاحك
اعتقد دا دور رامى رضوان وحسن الرداد
واسباب اختيارهم
لما جم البنات يتجوزوا ما دوروش على حد يقف فى جنازة
دورو على حد يحترم شغلهم ونجاحهم
رامى دايما شايف دنيا جميله وعظيمة وحبيبه ( راجعو كلامه عنها )
وحسن شايف امى حبيبه وشريكة واشتغلوا مع بعض كثير ( مش زى ممثلين تانيين قعدوا زميلهم فى البيت بعد الجواز )
اما موضوع الجنازات دا ،، حضرتك لا ناقصة ايد ولا رجل
تقدرى تقفى فى جنازة ابوكى زى البنات الجدعة
بنات الممثل العظيم نور الشريف الله يرحمة وقفوا خدو عزا ابوهم
بنات الشاعر العظيم عبد الرحمن الابنودى الخال الصعيدى وقفوا خدو عزا ابوهم
سهيلة بنت المحامى العظيم حافظ ابو سعدة زوجى الغالى وقفت جنب اخوها إياد وجنبى تاخد عزاء ابوها
لما هتشوفى نفسك انسانه كاملة مش هتحتاجى حد يكملك .. هتقفى بنفسك تاخدى عزاء ابوكى ولو وقف جوزك دا لان دا العادى لولاد الاصول
أما موضوع اختيار الزوج دا فأساسه زوج متربى ابن ناس يحترمك
وساعتها هيقف معاكِ لما تحتاجيه، وتقفي معاه لما يحتاجك».
