حوادث

«باع دهبي عشان المُخدرات».. إيمان تبكي أمام محكمة الأسرة

السبت 27/مارس/2021 - 10:06 م

هاجر الصباغ

«بيشرب مخدرات، وسرق دهبي وعفشي عشان يصرف على الحشيش والستات»، وقفت "إيمان" أمام محكمة الأسرة بالسيدة زينب تصرخ وتطلب الخُلع، وقائمة عفشها بعدما بددها زوجها على الحشيش وفتيات الليل.

مأساة الزوجة

في الدعوى التي رقم 65721 لعام 2021، أقامت "إيمان" دعوى خلع ضد زوجها وقالت: «معرفتش إزاي أحافظ على جوزي، بس مش معنى إن فيه بينا خلافات إنه يشرب حشيش، كنت بحاول أبني معاه بيتنا بأي طريقة، وأحافظ على ابنه بس في النهاية اكتشفت إن كل ده سراب، وهم، وإن تعبي ضاع من غير فايدة، ياخسارة عمري اللي راح هدر».

تعاطي الزوج للحشيش

وتابعت: «عرفت بعد سنة كاملة إن جوزي بيشرب حشيش، ومش كده بس، ده بيستغل غيابي عن البيت ويجيب فيه ستات غريبة، اتخانقت معاه وروحت لبيت أهلي، وقررت أعاقبه واحرمه من ابنه، عشان يحس بقيمتنا ويبطل، بس اتضح إني بعاقب نفسي، لأن الأوان فات وجوزي أصبح مدمن»، لتعود لمنزلها فتجده خالي من الأثاث.

الزوج باع الأثاث ليشتري المخدرات ويصرف ماتبقي على متعته الحرام، لتصرخ الزوجة إلى أن اكتشفت أن الذهب الذي تلبسه ليس حقيقيًا وإنما زائفًا «سرق دهبي من غير علمي وبدله بدهب صيني، وصرف الفلوس على مزاجه، ياريتني ما اتجوزته، ياريت فضلت في بيت أهلي، انجدوني وطلقوني ورجعولي كل حقوقي منه».

*وحقوق المرأة في قانون الخُلع الذي ينص عليه القانون المصري كالتالي:

1-حق المرأة في نفقة لأبنائها إن وجد

2-حق المرأة في أخذ المحتويات الواردة في "القايمة".

3-حق المرأة فى الشقة إن كانت حاضنة.

4-حق المرأة في حضانة أبنائها.

وحسب قانون الأحوال الشخصية الزوجة ترد مقدم الصداق المذكور في وثيقة الزواج فقط، كما أنها لا تأخذ مؤخر الصداق، لكنها لا تفقد أى شيء آخر سواء قدمه لها الزوج فى فترة الخطوبة من هدايا وذهب والـ"شبكة" أو في فترة زواجهما".