أكره شكلي وأتمنى أن أرى نفسي جميلة.. ماذا أفعل؟
روت فتاة مشكلتها عبر حساباتها على مواقع التواصل الاجتماعي، وطلبت من متابعيها ردودا وحلولا لها، لتفادي ما حدث معها واستقرار حياتها.
وقالت الفتاة في شكواها: "أكره شكلي وأتمنى أن أرى نفسي جميلة انا بنت في تالته ثانوي عندي مشكله مع شكلي من تالته اعدادي بدات اكره شكلي تدريجيا واخد بالي من حجات مكنتش شايفاها فنفسي وركزت كتير اوي لحد مطلعت كل العيوب الي فيا ومبقتش قادرة استحمل ابص لنفسي في المرايا ومش قادرة انزل اواجه الناس مبقدرش اعدي من جمب حد منغير محط ايدي علي وشي وبيبقي باين عليا عدم الثقه والخوف من شكلي قدام الناس".
وأضافت: "دايما بشوف كل البنات حلوة ومحدش فيه غلطه وبيتصوروا منغير فلتر وبيبقوا تحفه ولا غلطه ما شاء الله انا ما قادرة اعمل زيهم كدا وحتي شكلي فالفلتر مببقاش بالجمال الي هما فيه حتي في الحب محدش بيتقبلني زي مانا محدش بيتقبل شكلي بقيت بخاف احب ولد او اتعامل مع ولد يشوفني يتصدم ويكسر بخاطري دايما بسال نفسي لي ربنا خلقني كدا لي ربنا بيعاقبني وبيخليني عايشه ضحية ومظلومه طول حياتي حاسه كل حياتي بايظه ولا قادرة اصلي واقرب من رينا ولا قادرة اذاكر واخلص من الثانوية ولا حتي عارفه هدفي في الحياه اي مش عارفه انا عايزة ايه".
وتابعت: "دايما خايفه معرفش اخرت مستقبلي اي دايما بتخيل سيناريوهات وحشه اوي عن الي هيحصل بعد كدا فحياتي بسبب عدم مذاكرتي وعدم قربي من ربنا وشكلي دايما بلوم اهلي انهم خلفوني كدا واوقات بلوم ربنا ومش عارفه مين الي غلطان انا موجوعه اوي صادفت مواقف كتير فحياتي داست علي قلبي وكسرتني من الاهل قبل الصحاب نفسي انام واصحي الاقي نفسي بقيت جميلة والناس متقبلاني نفسي اتحب زي اي حد في الدنيا".
وواصلت: "نفسي اعيش بدل احساس الظلم الي انا حساه دا وبتكسر اكتر لما بلاقي حد من الي حواليا بيقولو العيب الي انا شيفاه بنفسي بتاكد انه كله شايف نفس الحاجه وشايفين انها عيب بزعل اوي علي نفسي بس عمتا حسبي الله ونعم الوكيل فاي حد قلل بيا سواء بشكل مباشر او غير مباشر مش مسامحه حد اذاني فنقطه ضعفي منهم لله".
وجاءت الردود عليها كالتالي..
كوني قويه تقبلى شكلك ، وانتى اصنعى من نفسك الجمال،ان الله سبحانه وتعالى هوالذي خلقنا ، وتقربى الى الله سبحانه وتعالى ، ولا تجعلى الشيطان وهواجسك تنتصر عليكى ، اهتمى بدراستك وكوني متفوقيه دراسيا ، وانظري للحياة بنظره جميله واجعلى لنفسك هدف ، والله المستعان...
عدم ثقتك في نفسك هو اللي بيخليكي تحسي الاحساس دا انا كنت يعاني بوجود نمش خفيف في وشي ودا كان يضايقني جداوخلاني ابص لنفسي اني مش جميله وبالتالي بدأت اتنازل عن حاجات كتير لغايه واكتشفت ان كنت جميله وان انا اللي ضيعت نفسي بعدم ثقتي في نفسي وان ياما بنات اقل مني مع وجود الثقه والصبر حياتهم اتغيرت وبقيوااحسن مني
لو إنتي لا زلت في مرحلة النمو والنضح مابين (15-25) سنة ... يمكنك تحسين شكلك بمقدار مقبول : الرياضة الصباح لمدة 30 دقيقة، تناول المكسرات والعصائر الطبيعية والبيض والشاي كمون والزعتر والنعناع، وتناول اللحم، إبتعدي بقدر الإمكان عن الأطعمة معلبة والجاهزة وسريعة التحضير وشوكلاته وحلويات وبيسكويتات، إشرب مياه لتر أولتر نص كل يوم لتجديد الخلايا و تعزيز النمو الأعصاب والأنسجة والخلايا والهيموجلوبين بشكل مناسب، هنا طرق مجربة في تحسين الوجه تلاوة القرآن وقيام الليل والإستغفار بالأسحار، ولابد من ملازمة الأوراد الشرعية الصبح والمساء وقبل النوم، من آية الكرسي الإخلاص القلق والناس راجعي كتاب "حصن المسلم"، لأن الضغوطات النفسية تشد الأعصاب و عضلات الوجه ويخلي جبين مقطب والفم مشدود والوجه مكشر.
بصي يا حبيبتي كلنا فى سنك عانينا من مشكلة عدم الثقة بالنفس والشكل خاصتا ان الاهل بيكونوا غير داعمين لولادهم ولا بيعطوهم الثقة فى نفسهم فبالتالي معندكيش الاساس اللي تتسندي عليه نفسيا عشان كده لازم انتي تعطي الثقة لنفسك بنفسك وبما انك لسة صغيرة وطبعا معندكيش فلوس لكن اعتمدي على الادوات اللي عندك فى البيت لتحسين بشرتك ااهم حاجة، تجيبي غسول للبشرة ينقيها وينظم الزيوت ويشيل البثور السودة وانصحك بغسول "ديير"تحفة لكل انواع البشرة وكمان شيلي الشعر اللي فى وشك بشفرات البنات هيفتح بشرتك وكمان هاتي مرطب للبشرة اهم شئ الترطيب وانصحك بالبانثينول بفيتامين سي خطير واشربي ميه ودلكي بشرتك كل يوم الصبح عشان تجري فيها الدورة الدمويى واعملي لشعرك حمامات كريم عشان يطري واعملي ماسكات فى البيت كلها حاجات فى متناول يدك صدقيني هتحسي بالتغيير شوية بشوية وهتبندي تحبي نفسك وتثقي فبها أهم حاجة صلحي علاقتك بربنا واعرفي ان اهلك مالهمش دعوة بشكلك دي خلقة رلنا اللي صور الانسان فى احسن صورة وىكزي فى مذاكرتك هي سلاحك عشان يكون لك قيمة فى المجتمع وربنا يوفقك ياحبيبتي ويهديك ان شاء الله.
اهتمي بنفسك ومارسي الرياضة واهتمي بشعرك وشكلك وبشرتك ولا تفكري في اي شيء الان ومع الوقت لن تدركي الا انك اصبحتي اجمل من كل الفتيات التي ترينهم في حياتك فالامر كله يعود لك انت وحدك ويجب عليك ان تفهمي هذا وان تحاولي الاهتمام بنفسك وبجمالك دون مقارنة نفسك مع بنات اخريات او التقليل من جمالك
ابنتي الغالية عليك ان تعرفي الحقيقة هل فعلا لديك مشاكل في شكلك ام انك انت من ترى انه يوجد لديك مشاكل في شكلك بسبب مشاكل نفسية لديك او مقارنات لا معنى لها لنفسك مع الاخرين فاولا انت لازلتي صغيرة ومن الطبيعي ان لا تقارني نفسك بفتيات جامعيات مكتملات الانوثة فانت لازلت في مرحلة بين الطفولة والشباب وثانيا يجب ان لا تحكمي على نفسك بمقارنتها بالسوشيال ميديا فهذا امر سيظلمك ويدمر نفسيتك