وقالت منال سلامة : "أعتقد لو إني دكتورة مش هبقى عايزة ابني دكتور لإني عشت وعرفت متاعب المهنة ديه، أنا ما استمتعتش بوجودي مع الأولاد زي أي أب وأم، يعني كنا في العيد أنا كنت في البحرين بعمل مسرحية مع أستاذ عادل أمام، وهما في مصر بيعيدوا، أنا لما ببقى فاضية عادل بيخرج، وإحنا مسافرين لوحدنا، معشناش تفاصيل الحياة العادية، زي مثلًا رمضان نبقى مع بعض على الفطار، كنا بنفطر ونتسحر في الاستوديو".

وتابعت: "مكنتش عايزاهم يعيشوا العيشة ديه، عايزاهم يعيشوا العيشة البسيطة التقليدية، مش عايزاهم يدخلوا في دوامة الشغلانة، أنا بعشق التمثيل، وبحترمه جدًا، وبحترم جدًا مهنة الفن وبقدسها، ومش معنى إني مش عايزة ولادي يبقوا فيها تبقى وحشة اطلاقًا، المهنة دي مهمة جدًا لتنمية الوجدان والفكر لدى الشعوب".

منال سلامة تشن هجوم على السوشيال ميديا 

وفي وقت سابق ،شنت الفنانة منال سلامة هجوما حادا على رواد منصات التواصل الاجتماعي "انفلونسر" بسبب دخولهم مجال التمثيل.

وقالت منال سلامة، في تصريحات إذاعية عبر أثير نجوم أف إم: "دخلت على فيسبوك بعد الثورة وبدأت أكتب آرائي عليه، ولكن لقيت الناس بدأت تفهم كلامي بشكل خاطئ وبيهاجموني بقوة".


وأضافت: "شعرت بـانهيار عصبي وقررت الابتعاد عن السوشيال ميديا، وكل علاقتي بيها هو تهنئة الناس أو وضع صورة من حفلة فقط، وأنا ضد السوشيال ميديا في كل حاجة في حياتنا".

وعن دخول بعض الإنفلونسر مجال التمثيل دون خبرة في المجال، قالت منال سلامة: "فيه ناس دخلوا مجال الفن وأخذوا فرص من على السوشيال ميديا لا يستحقونها، ليه عندنا أكاديمية فنون طيب ما نقفلها، وعلم التمثيل يُدرس في أفضل جامعات العالم وتؤخذ عليه شهادات ماجستير ودكتوراه، ثم يأتي شخص لا علاقة له بعلم التمثيل ويأخذ فرصة".