فتاة في ورطة: «خطيبي سابني واختار الموتوسيكل».. هل رد فعله طبيعي؟

روت فتاة مشكلة مع خطيبها عبر إحدى مجموعات الدردشة على منصة "فيسبوك" بعنوان "مشكلتي مع خطيبي" وبدأت حكايتها، التي شهدت تفاعل واسع من رواد السوشيال ميديا، قائلة: "خطيبي معاه موتوسيكل وبيحبه جداً بيروح بيه كل مكان لو رايح أول الشارع يروح بيه، وأنا ممرضة وهو بيقولي أنا هركبك ورايا وهوديكي المستشفى قولت ليه كده مينفعش يعني وعيب إحنا نجيب عربية أنا هسحب قرض علي مرتبي وأنت بيع الموتوسيكل وشوف معاك كام ونجيبها مع بعض واكتبها باسمك عادي أنا وأنت واحد".

وأوضحت فتاة مشكلتها مع خطيبها: "راح قالي أنا عندي الموتوسيكل دي أهم من أبويا وأمي وأنا مش هركب عربيات. وهو أصلا والله موتوسيكل صوته مزعج جداً المهم أنا اضايقت وقولتله ياما أنا ياما هو لقيته قفل و10 دقايق سمعت صوت كلاكسات وأنا عارفه صوته، راح اتصل عليا يقولي نزلي الدهب".

واختتمت فتاة مشكلتها مع خطيبها عبر مواقع التواصل: "أهلي كانو ميعرفوش حاجه المهم لخصت الموضوع في كلمتين مع أخواتي، راح أخويا الكبير قالي سيبك من كل المشكلة دي خالص دلوقتي إحنا علي موضوع أن هو بايعك وجاي ياخد الدهب وطالما مقدرش حد إحنا مش هنقدر حد ومش هنيجي علي كرامتنا وراح نزل الدهب وطلع علي طول، وبعدها ب5 دقايق رافع ستوري بصوره الموتوسيكل وكاتب أنتي أم عيالي... حسبي الله ونعم الوكيل فيه وفي الموتوسيكل.. هو فعلاً ده انسان طبيعي". 

اقرأ أيضا.. 

تفاعل عدد كبير من رواد مواقع التواصل الاجتماعي مع مشكلة فتاة مشكلتها مع خطيبها بسبب دراجة نارية، حيث علقت روان يوسف: "طب والله جدع، انتي مش مناسب معاكي واحد بيركب موتوسيكل بتتخطبيله ليه؟ هو حس انك بتقللي منه ومن الموتوسيكل بتاعه، قام سابك وانتي تستاهلي". 

فيما كتبت سمر محمد: "أبويا كان عنده عربية صغيرة مربعة كده بتاعت زمان دى كان لما ييجى من الشغل نسمع صوتها من على أول الشارع بره خالص كنا نبص لبعض أنا وأخواتي ونقول زنوبه جات أهى كان أبويا يزعل لو حد اتكلم عليها و لا بس نكون رايحين فرح أو مسافرين ونقول احنا مش راكبين العربيه دى صحيح، كانت بتعطل بعد ١٠ دقايق من المشوار وننزل نزقها بس اياكم حد يعيب على العربية و لا يقول عنها حاجة كانت تعطل في نص الزراعى ونأخدها زق".

اقرأ أيضا..