وتابعت: حصلت مشاكل بيني وبين زوجي من بعد ما خلفت بنتي كان معظم مشاكلنا بسبب أهله ،  وصلت لدرجة أنه ضربني ،  وسبت البيت وكنت هطلق بس عشان بينا حب كبير ، رجعنا تاني رجعت لما فهمت أن الحرب الحقيقيه ال مع أمه وأخواته البنات حرب خفيه .

 وواصلت السيدة مشكلتها قائلة: رحت لشيخ أكدلي ظنوني أن فعلا فى أذي بيتعمل وأننا مصابين بالسحر
بدأت افهم واجمع ال بيحصل ، عالجت نفسي وجوزي بدون علمه قرأت كل ايات السحر علي ماء وفضلنا نشرب منه وسورة البقره وبخور فى البيت ، جو البيت بقي هادي كتير .

انا موظفه وليا راتب وبحب زوجي وكل راتبي فى بيتي ، مكنتش بقصر فى حق اخواته وربنا يشهد علي كلامي كنت دايما اكرمهم واهديهم فى بيوتهم، لحد ما اكتشفت كرههم ليا وأنهم بقوا يقولوا عليا ربنا ما يجعلها دخله ده بيتنا وبيت عيالنا قعدت ٦ شهور بره بيتي محدش منهم رن عليا مره ، لحد ما هديت انا وجوزي واشتقنا لبعض وعرفنا أن كل الى حولينا بيخرب .

المهم جوزي سافر وبدء يتغير معايا تاني ويبعد عني ميكلمنيش ، وانا اتاكدت أن حماتي علي علاقه بساحر فى قريتهم بتعمل معاه سحر سفلي بدمار وخراب بيتي ، واخواته ماشين فى نفس الطريق انا اتاكدت وشفتهم بعنيا بس معنديش دليل .

خايفه علي بيتي وعايزه احافظ عليه بدعي ربنا ليل نهار يفضح سترهم ، هل اسعي وراها اجيب دليل ولا خليني فى حالي ؟ ولو قولت لجوزي ؟ اكيد مش هيصدقني وممكن يطلقني كمان  ، هما لابسين نقاب وبيحفظوا قرءان و يداروا علي نفسهم عشان محدش يشك فيهم .

بجد حسبي الله ونعم الوكيل
من فضلكم اعمل ايه بدون تجريح ؟
لأن بجد مخنوقه وتعبانه وحاسه بالعجز الموضوع حساس اوي.