فتاة تشكو خطيبها: «خطيبي بيتخلى عني بسبب تراكم الديون عليا».. ما الحل الأنسب؟

وروت فتاة مشكلة مع خطيبها الذي تخلي عنها بعد تراكم الديون عليها بسبب تجهيزات واستعدادات زفافهما، عبر مواقع التواصل الاجتماعي: مخطوبه بقالي سنه ونص، والفرح بعد أقل من شهر، مؤخرًا بقيت بلاحظ حاجات تقلقني وأنا مش حابه سوء الظن بس مش قادرة اتغاضي عنها فمحتاجه رأيكم، أنا وخطيبي ظروفنا علي قدنا و مفيش حد بيساعد معانا في التجهيزات، هو واخدني بشتغل و عارف أن أهلي كتر خيرهم عاملين اللي عليهم وزيادة معايا بس انا بشتغل عشان نفسي واحتياجاتي فمتقلش عليهم، ولو عليا عايزة اقعد بعد الجواز بس عشان ظروفه المادية قولت لو هشتغل عشان محملش عليه بحاجه وهو كفايه عليه اساسيات البيت (إيجار، مطالب المعيشه)". 

وأضافت: "بسبب التجهيزات استلفت فلوس ودخلت جمعيه عشان اسدد، فهو لما عرف كده قالي أنا مش هسددلك حاجه أهلك هما اللي يشيلوا أنتي ملكيش دعوة، وأنا مكنتش طلبت منه أصلا ولا جيه في بالي اخليه يدفعلي أي حاجه لأني معتمده علي نفسي، طبعا بالشكل ده مش هساعد في مصاريف البيت وأن شغلي رايح نصه للجمعيه والباقي يدوب يكفيني بالعافية". 

واختتمت فتاة مشكلتها مع خطيبها بعد تراكم الديون عليها، عبر مواقع التواصل الاجتماعي: "فهو زعق وشدينا وزعل ويقولي لأما تشتغلي وتساعدي في البيت أو تقعدي خالص .. وأنا قولتله مش من حقك تتدخل بيني أنا وأهلي وتتكلم في حاجه متخصكش ومبقتش مرتاحه لتفكيره خصوصاً أن دي مش أول مره أحس أنه مبيفكرش غير في نفسه وبس". 

اقرأ أيضا.. 

وانهالت التعليقات بسبب مشكلة فتاة مع خطيبها بسبب تراكم الديون عليها وتخليه عنها عبر مواقع التواصل الاجتماعي، حيث كتاب حساب بعنوان رضاك ربي: "أنا شخصيا الموضوع بتاع الفلوس ده عايشة في مليون قصة فيه ومن الآخر يا بنت الناس اللي واخدك علشان تساعدي معاه هيشيلك الليلة كلها في ظرف سنة وهيقولك هو ده اللي معايا وهي دي مقدرتي يا تعيشي كده يا تصرفي وتكملي أنتي وهيطلع عينك علشان البيت والعيال (مع إني مش ضد أن الست تساعد الوضع دلوقتي ميستحملش واحد بس يصرف) بس لا دي طريقة ولا أسلوب ولا حتي محترم أهلك وحاجة فمنتهي القرف، فنصيحة مني اللي داخل من الأول وباصص على اللي في إيدك ده بلاش منه علشان والله العظيم لو بقي معاه 30 ألف برضو هيبص على شوية الفكة اللي معاكي اشتري نفسك واهلك وسيبك". 

اقرأ أيضا..