وأضافت فى رسالتها : «انا متزوجه بقالي ١٥ سنه معايا ولد وبنت تانيه اعدادي وسادسه ابتدائي ، من زمان اوي وانا بشتغل لأني عارفه ظروفه على قده ، كل مره يعمل مشكله وارجع علشان أولادي.

وتابعت:  هو مستهتر بيقعد كتير من شغله ،  هو صحته كويسه مفيش حاجه تمنعه من انه يشتغل بس لما حماتي تسأله مش بتروح شغلك ليه ،  يقولها اصل انا بعندها على يعني .

 وأضافت: المهم بيلاقي أكل وشرب ببلاش يشتغل ليه ، وانا مش متعوده أمد أيدي لحد حتى لو أقرب حد ليا لحد ما مره برضوه قعد قولتله خلاص اقعد براحتك ، انا هاصرف عليا انا واولادي وانت شيل نفسك ، انا بعت دهبي واشتريت نصيب اخته في البيت لكن هو عادي مش فارقه معاه .

وواصلت السيدة مشكلتها عبر مواقع التواصل الإجتماعي قائلة: المهم مستحملش بعدها بشهر غير كالون الباب فشلتة وخليت أولادي بعدها بكام يوم تتربس البوابه من جوا ، ومرضاش يدخلنا جبت عمه وإبن عمه مفيش فايده المهم روحت عند أهلي ورجعت بعد ٧ شهور واخر مره وهكذا ..

وإختتمت قائلة : المره دي بقا غير كل مره بقالي سنه ونص ، مبعتليش حاجه ولا جنيه لما حصلت المشكله بعت لزوج اختي جه علشان يتفاهم معاه شتمه هو واختي بطريقه وحشه جدا محدش يتقبلها ، المهم اخويا جه ضربه وراح عمل محضر فيه هو وجوز اختي  ، وانا كمان عملت نفقه وقايمه وهو حاول يرجعني ، وانا مش عايزه ارجع انا كدا كدا بصرف وشايله المسؤليه لوحدي ، هو زي قلته انا بس خايفه أظلم أولادي هما اصلا مش بيكلموه ولا محسسهم انهم أولادو .. قولولي أعمل ايه؟ ».

اولا انتى غلطانه علشان اشتغلتى ، وغلطانه انك اشتريتى حق اخته، وغلطانه انك قبلتى على نفسك كده من الأول بس عامتا طالما ربنا مقدرك وبتشتغلى اختصى بنفسك وباولادك، ومترجعيش لشخص زى ده وانتى الكسبانه والله انا بنصحك زى اختى لان الكرامه فوق اى شى فى الدنيا وربنا يسعدك ويفرح قلبك 🤲🤲🤲🤲



عماد حداد:

بصي يا اختي مدام راجل معندوش نخوه ولا مسئوليه يبقا بلاش ، مدام وجوده في البيت محسوب عليكي راجل يبقا بالسلامه انتي ربنا رزقك وشقيانه ، وبتسعي لأجل المال للتكفل باحتياجات أولادك، انتي لو في مكان واسع عند بيت أهلك اقعدي معززه مكرمه في بيت أهلك ، وإصرفي علي أولادك يا إما والأفضل انك تأجري شقه وتقعدي لوحدك انتي وأولادك حتي الناس هتتعاطف معاكي للظروفك.


عصام منصور:

بصراحه المفروض الزوج الي بيصرف على زوجتة وأولادة ، بس انتى عودتية على كدة ودة طبع فى الانسان الي مش شايل المسؤلية بصراحه.